Ha Noqonin Heeryadiisa Cune

Wax badan baan hogotusaal

Hoos iyo korba wax ugu iroo

Meel kale aanan hillane

Bal taydana aan hinjiyo

Naftayda mar aan la hadlo

Hirarka suugaanta galo

Sidii haan boos ahayd

In badan hoos wax loogu shubin

Dhaaxay waanadu hoddee

Bal aan heesaha ku dayo

Harkiyo labadiisa galin

Habeynku waa is riixayaan

Adduunna hawl kama dhammaan

Intaad higso leedahay

Hohey, mawdkuna ku hareer socdaa

Hadduna ma ogi goorey noqon

Waxaan heedhe aan ku iri

Ama hooy aan ku iri

Hagagga lama daadiyee

Jeceylka hantaqada ka daa

Ha noqon heeryadiisa cune

Hubsiino ayaa la yiri

Hal baa lagu doorsadaa

Waxaadan helayn

Adoo ka haraa habboon

Habaar-qabe ha noqonin

Hanfade sida haadka lala

Hikaaddu u dhaadhacayn

Cidiba aan abaal u hayn

Habluhu waa walaalahaa

Haweenku sida hooyadaa

Horaadka ku jaqsiisaysoo

Iyaga hagar lagama galo

Kalgacal hubuq laguma rido

Dadka ruuxii kuu handada

Amase hagaagga jecel

Iyaga waa lagu hirtaa

Hayeh baa qalbiga u roon

Waxaan heedhe aan ku iri

Amase hooy aan ku iri

Hagagga lama daadiyee

Jecaylka hantaqada ka daa

Ha noqonin heeryadiisa cune

Erayda: 
1- Hillane: godlin; irmaansan.
2-Hinjiyo: kor u xanbaaro; xoog u qaado.
3- Haan boos ah: haan wax badan lagu dhaqmay.
4- Hoddee: gabtee; khatashee.
5- Hadduna: wadkuna; geeriduna.
6- Hagagga: Hadalka, hadal kale laga horkeeno; muran.
7- Heeryo: waxyaalaha awrka la saaro.
8- Hanfade: waxba aan hubsan; fudude.
9- Hubuq/Hantaq: meel lagu dhaco oo lagu waxyeelloobo sida hogga.
10- Handada: weyddiista ama wax ku warsada.