Guur Aan Ka La'aado (Gabay: Xaawo Bulxan Cali)

Indhoweyd murtidii geyfanayd, waa anigaan geline

Waatii aan gees maray naxwihii, Guulle ii qoraye

Maantana wax baa igu gujeeyee, ma aanan goobeene

Ruuxna gaar u may lahayn murtidu, waa qofkii garane

Gabdhihii la caayee xumaha, gurada loo saaray

Haddii aan gar eexaad la naqin, waa gef hadalkaase

Idinkuba wax baad geleleftaan, ka la guraysaane

Maxaa libin ku-geeraarka iyo, guusha idin siiyay?

Guyaal iyo guyaal badan haddii, nala ku soo guuray

Goor iyo ayaanba haddaan, ciil la galawlaynnay

Caro gaamurtaan wada qabnaa, gebi ahaanteene

Gacan bidix ayaad nagu waddeen, tan iyo goortaase

Haddii ay gadoodaan habluhu, la ma guhaadsheene

Gabyayaal inay noo kaceen, geliya laabtiinna

Aqoonyahanno gaamuray oo murtida, wada gorfaynaaya

Inay maanta wada geyfan yiin, geliya laabtiina

Markiise aan garaadsaday iyo haddooy, garashaday buuxdo

Raggu waxay abid guranayeen, godob xumaanteene

Garaadli’i ma haysee gabdhaha, jaaniskaa gabaye

Guriga iyo intaan ubadka iyo, fool la gubanaynnay

Nagu gaadde gabayada xunoo, gubaya jiirkeenna

 Gefkaad naga gasheen inuu ciqaab, idin geyaysiiyo

Rabbina idin gargaarin oo nabsigu, idin ku soo guuro

Guyaal baan sugaynnoo waqtigii, waa la soo galaye

Guryihiyo haddaad naga jafteen, ubad gardaadsiinta

Aan googaalaysannee ina ragow, goobta noo fidiya

Guushuna kuway raacdo aan, wada guddoonsiinno

Afartaa gorfeeyaye mid kale, aan giraangiriyo

Geyriyo ufada soo dhacdiyo, yaare aan geliyo

Gucummaale aar iyo sidii, goosha aan reemo

Aan guul-guulo afarreey-guntaha, guushu waa aniye

Gosha aan la baxo kaan naxwaha, garan ujeedkeede

Xaajadana aan soo gambiyo, way gun weyn tahaye

Aw-yuusuf gabayguu tirshiyo, gedihi uu sheegay

Yamyam wuxuu ka gaaftee u yiri, guur aan ka la’aado

Aniguba gaddaas oo kalaan, qayb ka gaabsadaye

Na ma wada geyaan nimanku oo, qaar ayaa gurane

Kuwa gogosha aan loo dhigayn goyn, aan ka higaadsho

Dabaguraha gooraha xun jecel, gabar ardaa jiifta

Gaatamaha tuugada u guda, goor dhexiyo leylka

Gaajoonahaas aan dhergeyn, guur aan ka la’aado

Midka giniga haystee ku xira, jeebka gudihiisa

Een garanin reerkaaga geli, Guulle wuxuu keenay

Intii aan galluubnaan lahaa rafaad, guur aan ka la’aado

Marti geyre dhaxanliyo ku timid, guure iyo dheelmad

Gogolkaan u soo qaadinoon, sooryo gelinaynnin
Intii gacalki uu hiifi laa, guur aan ka la’aado

Midkaan geedka laga naadin oo, goobta laga sheegin

Oon tirada soo gelin kolleey, saami wuu gabaye

Intuu aniga ii guuxi laa, guur aan ka la’aado

Midkaan ehelka garan oon wanaag, gacan uqaadaynnin

Ilmadowda gaajoon midkaan, gelin qadaa siinnin

 Intay guriga ii ooyi layd, guur aan ka la’aado

Midka gada dharkiisoo rahmada, waa gu’ baaqsadaye

Intuu qaad ku soo gadan laa, go’a sariirtayda

 I ma geyo nin qaawane midkaa, guur aan ka la’aado

Kaan garan salaaddiyo waqtiga, Guulle faral yeelay

Googoyska cibaadada gefee, geesta uga leexday

Oon masaajid soo gelin waqiis, guur aan ka la’aado

Midka guurka diidoo macsida, abidki goobaaya

Een garan samaantee xumaha, daba guclaynaaya

Saanigaa Ilaahay ka go’ay, guur aan ka la’aado

Midka diinta garanaaya ee, gooyay dhaqankeeda

Shareecada midkaa garab maree, gaalo dabaraacay

Garaad-xumaa u geysee dulliga, guur aan ka la’aado

Caasi ganaya hooyadi intuu, gumuc u soo qaato

Ama cay ku gaacinahayoo, nabar ku guulaaya

Gayaan ku ma habboonee midkaa, guur aan ka la’aado

Garruun xaasidnimo loo tabcoon, garasho hoos oollin

Gafuur-jabin midkaa i la rabeen, gacalo ii haynnin

Intuu ii la gaatami laa ul weyn, guur aan ka la’aado

Xilagube gasiin iyo aan bixin, maro is gaarsiisan

Guudkana islaam uga egoo, gogosha ii jiifa

Intii goor xun aan ooyi laa, guur aan ka la’aado

Guullihii abuurtiyo midkaa, nabiga cayda ku la geyfan

Gabood-falaha diintii gudbaye, dhaar aan ka la goynnin

Gaalkaas Ilaahay ka go’ay, guur aan ka la’aado

Gaarida wanaagga le midkaan, garan abaalkeeda

Gafuur-buure aan ruuxna garan, wuxuu gollaynaayo

Gujeeyaha gunuusee guryama, guur aan ka la’aado

Kaan jikada galayn oo ilmaha, gelinna haynaynnin

Oo aan garawshiyo lahayn, saacidee gabadha

gacan kaan siinayn bugtada, guur aan ka la’aado

Waalidkay midkaan gobonnimiyo, sharaf ka goobaynnin

Guuleed walaalkay ninkaan, gaar u magacaabin

 Ee xididka gooyee aan rabin, guur aan ka la’aado

Gabagabo dagaal iyo markii cadaw la guulaayo

Gantaalaha markii lays ku riday ee, geesi diriraayay

Giiryaalaha gadaashayda maray, guur aan ka la’aado

Midka Gaawadii oo dhashay iyo, Goodir dabajooga

Galaxeeda caanaha midkaan, goommanaha siinnin

Bakhayl gurigi loo ma soo hoydee, guur aan ka la’aado

Mooryaanka gaajoon ee waddada, tuugadaw gelaya

Googaradda dumarkiyo midkaan, garanna dhaafeynnin

Jidgooyaha islaamkii gambiyay, guur aan ka la’aado

Qabqablaha gumaadee shacbiga, dhiiggi gadanaaya

Dawlad gaamurtiyo kaan jeclayn, calan shan-geesoodka

Ee gaar kaligi nolol u raba, guur aan ka la’aado

Balwad kay gagabisee fadhiya, cooshka laga guuray

Qaadka iyo garaabada midkaa, guranayee jiifa

Ee qiimihii nolosha gabay, guur aan ka la’aado

Hinaasaha guryama ee shakigu, gebigi buux dhaafshay

Gurigayga kii soo agmara, guullan ka-horgeyska

Guufanayska waardiyaha gala, guur aan ka la’aado

Guurbadane gabadhuu arkaba, meher la gaadaaya

Xannaanada gurboodkana dayaca, gurina aan joogin

Gododlaha cidlada iiga guday, guur aan ka la’aado

Midka deriska guul-guula oo, gawnaxyada buura

Intuu gaarka joogana Cambaro, gaabsatee cararto

Xaawaleyda kaa gabawarana, guur aan ka la’aado

Allow deeqsi geesiya halyey, diinta garanaaya

Garaad badane gobannimiyo sharaf, looga gogol yeelay

Adaan gacanta kuu hoorsadee, calafku ii geeyo

Gabay ku ma idlayn karo raggaan, gacalo loo hayne

Damiirkiisa-gade baa jiriyo, ceebta gurigeede

Dumaroow garwaaqsada raggii, laga gol roonaaye