Galaan Goolleey (hees)

Goodkiyo abeeskoow
Gucumaale aaroow
Wiyishaa gadooddee
Geeska rayska galisaay
Gerigiyo haldhaagoow
Galowgiyo shinbirahoow
Garasho seed u leedihiin
Caashaq ma idin galay wali
Labo gacal ahaayoo
Kala gooyay waayuhu
Gargaar maw taraysaan
Ma isu geyn karaysaan?

Galaan-goolleey 
Gef bay baratee siddiri gam
Hadday gabar tahay 
Anaa gaya ee siddiri gam

Haddii aan go'doomoo 
Gaari waayay taan rabay
Gar bay noqotay caashaqa
Inaan dabo gurguurtee
Xagga gebi xaggana gebi
Gudcur daaha soo rogay
Gaashaan-qaad habaabiyo
Gulufoow dhul kuu siman
Gurmadkaygu weeyee
Geedahaan ka baqayaa
Goormaan socdaa
Xaggee gaari karayaa?

Galaan-goolleey 
Gef bay baratee siddiri gam
Hadday gabar tahay 
Anaa gaya ee siddiri gam

Adduunyadaan galgaladkee
Gaafaha nabsigu wado
Rag baa goor xun waligii
Gabagabo fariistee
In kastoo la gaadoo
Laga gacan sarreeyo
Geesigu ma liicee
Gami' maayo ruuxii
Goob aboodi seexdee
Gaari iyo ninkeedee
Yaa geyaan is jecel 
Gogoshood yaqaanna?

Galaan-goolleey 
Gef bay baratee siddiri gam
Hadday gabar tahay 
Anaa gaya ee siddiri gam