Guur Aan Ka La'aado (Gabay; Cabdulqaadir Xirsi Siyaad (Yamyam "AUN")

Godkii aakhiree lagugu riday jeer, uun baan galiye Naxariis gu' weyn baan Rabbigay, kuu galliinsaday Aw Yuusuf gabaygii ahaa guur, aan ka la'aado Gabdhihii markaa joogay eed, diidday gogoshooda Gefefkiyo tilmaamihii caddaa, eed ku gali wayday Haddaad maanta goob joogi layd, ka ma gidaaddeene   Geeraarka adigoon maqlayn, kaagi garab yaalla Cimrigiyo gabdhaha aan waqtigan, isku soo gaarnay Aniguna intaan uga gabbaday geed, aan ka iraahdo   Gablan iyo inaan ubad dhalaa, way gudboon tahaye Madaxayga guudkaad cirrada, galayax mooddaaye Gabowgii waxaa iiga haray, dhawr guyoo kale e Guumays waxa iga dhigoo, doobka igu gaaxshay Een dumar qaar uga gabbaday, geed aan ka iraahdo   Guduud iyo adoon qurux hurayn, gaari aad xulatay Beri hore gayaan iyo kuf baa, wada gudboonaaye Geelana middii qaayibtaa, loo gunnayn jiraye Intii aan bacow gaadan laa, golo-ku-joog fiican Mar hadday gar-dhalad wada noqdeen, guur aan ka la’aado   Caadadii la gooyaaba waa, geeri iyo ceebe Guudkii badnaa iyo tintii, gedefka aad moodday Ee guur ninkii doonayaa, muuqa garanaayay Garoob iyo middii reer liyo, taan la guri gaysan Gambooleey hadday wada noqdeen, guur aan ka la’aado   Gaabsiga xishoodkiyo middaan, edebtu soo gaarin Ee maro guntiimaysatee, gibilka qaar muuqdo Ee naasku inuu giigsan yahay, wiilka gelinsiisa Markay wada gabraartaan intaan, goyn lahaa madaxa Anna geeshku ii bixi lahaa, guur aan ka la’aado   Goobatada habaynkii guddeen, goor walbaba joogsan Gasiiriyo middii aan Jimcaha, geedka laga waayin Ee ina-rag kii mini waddaa, raaco gacanteeda Marna tii aan gaagixin haddii, gorofka loo qaado Intay gaari iga raaci layd, guur aan ka la’aado   Geerashkiyo middii xeer taqaan, qaadka gurigiisa Gogoshiyo falaasyadii middii, kala dhex gowdiidda Ee jaa’ifada loo guree, lagu habayn guuro Ee labo gondoodoo nin kale, galan galcaynaysa Intay galab rag kale ii keeni layd, guur aan ka la’aado   Garab rarato meel ku ma gabata,, guura bahaleeya Sida igar gandaalkeed la sido, niman ku gaaf meera Gurashada sigaarkiyo shaxaad, gees walba u bayra Markaa googo' kii siinayaba, gacalsatee raacdo Waabaayaday gurubsataa taasuye, guur aan ka la’aado   Tan ciddiyaha aan gurin tintana, gaabisee marisa Goodaaddo beer dheer aan cunin, dheefta gurigooda Gidaarrada habaynkoo bar tegay, wiil garbaha haysa Gorayada surwaalka leh middaan, ruux u garan waayay Xidin-xiitadaa aan gam’ayn, guur aan ka la la’aado   Gunuus-badan had iyo jeer gurxama, deriska guul guula Garba qaawan wiinbaar gashada, gogol ma loo doona Gaagabsiga yar mooyee marnaba, guurka ma-xusuusta Dhaylada middaa loo gadee, awlal kaga goysa Xuurtaa aan hamuun goynahayn, guur aan ka la’aado   Tan aqoonta loo gedo baree, garasho loo yeelo Cilmigaa asaageedu gayo, tii la garansiiyo Gargaariyo markii reer tashigi, gacal ka eegaayay Haddii ay quraarado gashoo, gaalo la ciyaarto Gablan bay adoogeed ka tahay, lagu ma goohaane Caro waalid bay galabsatee, guur aan ka la’aado   Garoob maal leh oo dhawr sacaad, waabka soo gelisay Oo guri cariishiyo dukaan, ganacsatee haysa Caanaha garoorka ninkay, gelin dhexaad siiso Noloshiisa anigow garlay, guul ka dhigataaye Intii lay guhaadayn lahaa, guur aan ka la’aado   Midda guursatee guriga lee, gabannadii tuurta Ee baladka gaash-gaashisee, gaatin soconaysa Ee goor qaboona ah baxdee, godadka fiid meerta Guulguulka waa lagu yaqaan, raro-gubyoodka ahe Intay ubadka gaasiri lahayd, guur aan ka la’aado   Tan gugeedu weyn yahay asii, gaanisada dheesha Een da’deeda la gooshinee, gurbaysnimo ku faanaysa Googoradda bowdada ka maqan, xaluska giirgiiran Waa cudur nasoo galay asii, aan la garanayne Cimrigeedii taa gabawartana, guur aan ka la’aado   Tan jacaylka gaaddada u suran, meel walbaba gaysa Ee dhawr nin guubaabisee, laxawga gaarsiisa Adaan gooni kuu ahay waxay, kugu garaacdaaba Markaad labada daarood gaftay, kaa xamaan guran e Dumaashiday intaan gocon lahaa, guur aan ka la’aado   Midda ganaca weyn lee ibtilo, caasha loo galiyay Ee nabar la gaadhsiiyay iyo garac, la soo dhooftay Ee gabanka aabihiina tiri, waygu gacan sayray Indha guray dhafoorrada gotaad, taa ku garataaye Ceebteedu i ma soo gashee, guur aan ka la’aado   Guunyada middii aabbaheed, lagu galiimaystay Waxay gogato taan waayinoo, gaajo wali taaban Ee gacanta maal ugu jiroo, gaari dheer wadata Nin quraad u gaar tahay, yaan ruuxna galinayne Intaan gaws libaax gali lahaa, guur aan ka la’aado   Guddoonkaygii goortaan intaa, gacan-togaaleeyay Oon waliba soo gaabiyoo, qaar u gali waayay Gogol iyo sariir aan lahayn, gaari raalliyo ah Inaanan galangalcayn baa tashigu, iiga gow yiriye Maxaa kula gudboonaan lahaa, taniba waa goor e? Erayada: 1- Galliinsaday: durraansaday, baryay. 2- Gidaad: diiditaan, dudid, diidmo. 3- Galayax: aad u cad 4- Guumays: guur-la'aan ku weynaatay. 5- Doob: da'diisu weynaatay isagoon guursan 6- Kuf: xagga guurka u dhigma ama u qalma. 7- Gar-dhalad: bisha 30ka beri ku dhalata. Halkaan isku si noqday. 8- Gedef: qaab wareegsan leh 9- Gibil: jir, oogo.  10- Gabraartaan: ugaarsadaan, goobtaan. 11- Geesh: ciidan. xoog ciidan sida XDS. 12- Gasiiro: Gasiiro wuxuu ahaa baar ku yaallay Muqdishow oo lagu caweyn jiray. 13- Gorof: bire; toobke; gaawe. 14- Gawdiid: fadhi; yuurar 15- Jaa'ifo: khidmadda guriga lagu baashaalayo. 16- Gondo: jeenyo; addimmo. 17- Gandaal: maqaarka hasha igarka lagu maalo. 18- Goodaddo: nooc ka mid ah nafleyda loo yaqaan qallajista. 19- Gunuus: guryan; hadallo cabasho ku salaysan oo hoos loo yiraahdo. 20- Winbaar: Maro aan wax qumman asturin. 21- Gaanisada: wuxuu u jeedaa taangada. 22- Gurbaysnimo: carruurnimo; dhallaannimo; yaraannimo. 23- Gabawar: halligaad, afgambi. 24- Xamaan: agab; alaabo. 25- Garac: wacal, aan aabbihiis la aqoon. 26- Gacan-togaaleyn: laactan; isku-dayga in gacanta lala gaaro la isku dayo.