Harodigeed (hees)

Hawlahu adduunyadu 
Waa kuwa is haystoo
Aan kala haraynoo
Hammiga iyo faraxuna
Midba waa halkiisee
Habeyn-dhalad midkii ah
Iyo kii nasiib ku haray
Ways hareer socdaanoo
Kala harina maayaan
Aniguna Haweeyaay
Naftaydii habeynnadaan
Halis bay ku sugantoo
Hillaac aan dhaweyn baa
Halka geelu daaqiyo
Beesha Harodigeed iyo
Hawd iiga muuqdee

Dhul uu huguf ku da'ayoo
Hambalo ay ku taal baan
Ku haloosiyaayoo
Maskaxdu ay la hadashaa
Hogol aan roob lahayn baan
Hor boqoolayaayoo
Haadaamo qodan baan
Ka dhex heesayaayoo
Jaceyl aan harayn baa
Heeryada i saaroo
Jinni haatufkiisaan
Haasaawiyaayoo
Haybshaa jacaylkiyo
Halka aad ku nooshee