Taladaan La Ruugin Waa Lagu Rafaadaa (hees)

Wiilka:
Rugta lagu abaarsado
Raranka iyo uumiga
Haddaan reerka laga rarin
Xoolahaa ku riiqmee
Naftaydaa ku raacdee

Waa rune waa rune
Adna ha iga roorine

Gabadha:
Naftaada i raacdeed
Iga raaridaysaa
Haddii ay run kaa tahay 
Kaa roori maayee

Taladaan la ruugin
Waa lagu rafaadaa

Wiilka:
Geel rimay ninkii sugey
Raadsaday markuu dhalay
Ramadkiisa maaloo 
Baahida ka raystee

Waa rune waa rune
Adna ha iga roorine

Gabadha:
Hawraar la raaciyo 
Raad ma laha beentuye
Qalbigaan rigrigay bay
Ruxayaan maahmaahuhiye

Taladaan la ruugin 
Waa lagu rafaadaa

Wiilka:
Raasamaalka guurkiyo
Raaxada adduunyada
Raalliya ninkii helaa
Ragannimo ku faanee
Naftaydaa ku raacdee

Waa rune waa rune
Adna ha iga roorine

Gabadha:
Rag waa xilo bilaaliyo
Geesi ruuxa deeqee
Middaad tahay rabbaa oge
Kala reeb faalladoo

Taladaan la ruugin 
Waa lagu rafaadaa