Dadna Adaa U Qurux Badaneey (hees)

Dalsankii Wiriiroo
Xilligu ku di'i jiray
Danbasamuhu ku onkaday
Darantuna ugbaad tahay
Oo ramadku dayr dhalay
Dir-cadkiisii loo dhigay
Nirgaha meel duleedka
Damballada harkoodana
Dikrinayso culimadu
Hablo dahab la moodiyo
Doobkiyo barbaartuna
Ilaa waagu daalaco
Sacabka aanay deynayn
Daymayda sideedii
Marka aan ku daawado
Qalbigay igu diirsada

Dadna adaa u qurux badaneey
Deegaanta roobkiyo
Adaa doogna ka udgoon
Dumarna waa adoo qura
Dookhna waa kan igu jira

Xiddigtii Dagaariyoo
Dayaxa iyo cadceeddiyo
Deris oo gantaalaha
Dacallada ka bixiyiyo
Diillimo iska hor yimid
Daahay dhammaanoo
Cirka meel ka wada dagay
Oo dab iyo nuurkiyo
Midabkooda dahabka
Daaweystay maalmoo
Danwadaag shucaac u le
Dusha caad isaga maray
Dar Allee jalleecada
Waxay dunida u eg yiin
Dambi li'i adaa jira

Dadna adaa u qurux badaneey
Deegaanta roobkiyo
Adaa doogna ka udgoon
Dumarna waa adoo qura
Dookhna waa kan igu jira