Waa Naas Adduunyadu (hees)

Nabar halista gaariyo
Naftii cudur ku raagtaa
Ku ma naaxdo soore
Ninkii tabar darraadaa
Nacas lagu tilmaamaa
Naannaab habaabee
Ku ma nicine adigaa
Naafeeyay taladoo
Waqtigii nugleeyee

Niyaddaan ku xiray meel 
Soo noqonba weydee
Anigiyo nasiibkay

Waa naas adduunyadu
Ruuxba maalin nuugoo
Ninna loo ma daayee
Adoo saaka nabad qaba
Naxdin galabta kuu timid
Nolosheeda weeyee
Ma nastoo ayaan qura
Intaan hawl ka neefsado
Nafta meel ma hariyee

Niyaddaan ku xiray meel 
Soo noqonba weydee
Anigiyo nasiibkay

Gocosho iyo Ciil

GOCOSHO IYO CIIL

Sidaan ka barannay maansoyahanka S/liyeed loomo tiriyo tixda muraad la’aan. Haddii ay dhacdana maansadaasi ma yeelato muggii ku habboonaan lahaa ama milgada inta badan loo muujin jiray suugaanta hodonka ah ee S/liyeed. Waxaa si wanaagsan u cabbiray gabyaagii yiri;

Haddaan gabayga uurkoo bukiyo, arami' kaa keenin

Ama olol jaceyl iyo xanuun, kugu ijbaareynin

Afka un baad ka leedee erayadu, arar ma yeeshaan

Haddaba maansada hoos ku qoran baan maanta u sharraxan in la qiimeeyo, waxaana u deynaynnaa akhristaha. Maansadaan waxaa curiyay kan qoray erayadaan;

Haddii gacalkaa la weeraro

Guluf aan naxeyn iyo

Hadduu gabagabeeyoo 

Uu galo col gaamuray 

Guuyadoo la qaadiyo

Garcastoo la laayiyo

odoyadoo la gawraco

Gabannada carruurta ah

Gambooley la dayneyn

Gambiga iyo dhibaatada

Galaayuuska dumarkiyo

Gurdanka iyo qaylada

Gamaskoo la boobiyo

Waa tii la guran jiray

Gaalleefta iyo warankee

Gurmadka iyo raacdadu

Waa tay gucle iyo orod

Imaan jireen goor hore

Maxaa gooni kaa dhigay

Ka reebay garashada

Misna gaabis kaa dhigay

Gabbacyeyntu waa maxay?

Haddii guri walaalkaa iyo

Gaaridii uu qabay

Geenyaduu lahaan jiray

Heensaheeda gaarka ah

Gayaan kale dookhu bado

Ardaageeda soo galo

Intay xumo guddoonshaan

Gabbashoo xarootiyo

Lala gudo hameynkii

Gardarrada iyo maggaas

Gunnimada iyo ceebtaas

Waa in laga gadoodaa

Gama’ iyo hurdana daa

Guntigaa la giijaa

Gumuc iyo rasaas baa

Iyo gaan tolkaayaa

Sida geeshkii oo kale

Garammooda la dhoobaa

Guubaabo iyo dhaar

Dagaal lagu galaayoo

Gobaad lagu dhacshaa

Maxaa gooni kaa dhigay

Kaa reebay garashada

Misna gaabis kaa dhigay

Gabbacyeyntu waa maxay?

Anigoo gudboonaa

Garaadoo nin rag ah

Aqoonteyda guud iyo

Tayadaydu gaar tahay

Gubniyadii ka soo baxay

Waa taan gu’yaal badan

Samaheenna gooboo

Gabbal dhaciyo waabari

Sida gaar ilaala ah

U go’naaday hawshee

Markii uu gabraatuhu

Igu ganay fallaartii

La ila goobay maartii

Aan gabayoox cidla

Sidii aarkii Ceel-Gaab

Kaligey aan gayllamay

Hiillo iyo gargaar baan

Kaa dhawray geellow

Gadiid maalin oo idil

Geestaada eegee

Haddaan go’ walaalow

Ama gaasir ahaadaba

Garabkaa bannaanaa

Waa adigaan gabbanayee

Maxaad guula ood heli?

Maxaa gooni kaa dhigay

Kaa reebay garashada

Misna gaabis kaa dhigay

Gabbacyeyntu waa maxay?

La gundhigay adduunkaan

Carro-edeg galoolneyd

Marka geesi uu kaco

U gargaaro kii daran

Deeqdiisu gaadhaba

Goohiisa wacan iyo

Guuxiisa maqalnaba

Giiryaale fulay baa

Geestiisa joogoo

Doqon geeso weyn baa

Waligeed ku gaarnayd

Maantana geddii baa

Guryaheenna taaloo

Gaadmadii shisheeyaha

Golxadkii sokeeyaha

Gaallaysyo badan baa

La ii gaaciyaayoo

Waa la igu goobtee

Adiguna goobbilow

Sidii goraygii Baal-Taag

Garraar sare ka fuushoo

Gaallisada ciyaartee
Haddaan guuro oo tago

Geeddi dheer aan galo

Foore iyo geyraa

Buulashada galiyoo

Gocasho iyo ciil baad

Guhaad iyo xanuun baad

La gandoodsan doontaa

Gabbaad kale miyaad heli?

Mise garashadaadaa

Dib u gaallineysoo

Guniddii daboolneyd

Kaa deyran gaannow

Maxaa gooni ka dhigay

Ka reebay garashada

Misna gaabis kaa dhigay

Gabbacyeyntu waa maxay?

Waxaan Galabsadaa La Iga Goynayaa (hees)

Goor iyo ayaan
Socod dheer galoo
Intaan daal gab iri
Tillaabada gabee
Meelna gaari waa 
Geeddigaan wadoo

Waxaa iga gadmaday
Oon gees ka maray
Gubad roob heloon 
Galabta haybiyaa

Godob sidaan qabaan
Gama' diidayoo
Dhulkii lay goglaa
I guhaadiyee
Cirkan gaafsanina
Way gabagaboo

Waxaa iga gadmaday 
Oon gees ka maray
Gubad roob heloon
Galabta habiyaa

Geyi waaqle oo
Laga guuray baan
Raad goobayaa
Anna goor dambee
Garashiyo wanaag
Anaa gees maroo
Nabsi guurayaa
Gondaha i jaroo
Waxaan galabsadaa 
Layga goynayaa 

Wuxuu Sabanno badan Geelu.... (hees)

Wiilka:

Wuxuu sabanno badan geelu

 Saynta u ruxaa

Mar uun baad Sasabaniyo

Siyow ka cabbi doontaa

Anna waxaan saqaafaha

Iyo sahanka caashaqa

Saymaha u marayaa

Waa si aannu u kulannee

Jaceylkii sacabbo furan hooyaa!

Ayaankeen barisamaad helayey

Aroos-keennii sal dhigayey

Sidaas ku garoo la soco eey

Gabadha:

Waxay sabi ilmaha hooyadu

Gosha ugu siddaa

Sakaar loogu koriyaa

Abaal laga sugaayee

Annaa waxaan sidoo kale

Caashaqa sasabiyo

Samir ugu dhaqaayaa

Wuu i san dulleeyee

Jacelkii ma sidig irmaan hooyaa

Saadaashu ma guul allaa heellayoy

Arooskii ma saaddambaa yey

Sidaa u gartaye ka soco eey

Wiilka:

Waxaa subagga iyo heenka

Senge loogu shubayaa

Hubka loo sifeystaa

Sikatiga colaadeed

Anna waxaan la salalaa

Saqda dhexe u toosaa

Sawdkii jaceylkaa

Samada iiga yimide

Jaceylkii sacabbo furan hooyaa

Ayaankeen berisaamd helayey

Aroos-keennii sal dhigayeey

Sidaas ku garoo la soco eey

Gabadha:

Waxaa sarsarka adag reerka

Sarmaan loogu oodaa

Saan tuug gurguurtiyo

U soo marin dugaagguye

Seddex boqol maalmood

Iyo tiro sagaashana

Sidka geelu weeyee

Ma soo gaaray caashaqu?

Jaceylku ma sidig irmaan hooyaa

Saadaashu ma guul allaa hellayoy

Arooskii ma saaddambaa yey

Sidaas u gartaye ka soco eey

Erayada:
1- Sasabane; Siyow: waa laba ceel oo ku yaal dhulka Soomaali Galbeed.
2- Saqaafe: marin; meesha la maray.
3- Saymo: meel dagaal xun ka socdo.
4- Heen: dufanka fuudka kor ka saaran; dufanka lafaha geela.
5- Senge: neef lab oo la dhufaanay.
6- Sikati: baqdin; cabsi.
7- Salal: hurday oo argagax la soo booday.
8- Sarsar: xeyndaab; deyr 
9- Sarmaan: geed qodax leh
10-Sid: inta hooyadu ilmaha uurka ku waddo.

Ma Inaad Kalgacalka Laashaa? (hees)

Lahashada jaceylkiyo
Lahashada naftaydaa
Qalbigay lurayoo
Laamaddoodi waayee
Waxay laabtuu doontaa
Innagoo lammaaniyo
Laba nolol wadaagtoo
Kala leexan noqonnee

Ma inaad laba seef ahaataa
Ma inaad kalgacalka laashaa
Ma inaad lumiso aqoontaa
Ma inaad libidhoon ku waayaa?

Lallabaha hayaankiyo 
Lugtu socod ma daysee
Waxaa layga baaqaa
Looliga Galduure
Waxaan wali ku laalnahay
Halkii laydha caashaqa
Leexadu i geysee
Soo laabmi waayee

Ma inaad labo seef ahaataa
Ma inaad kalgacalka laashaa
Ma inaad lumiso aqoontaa
Ma inaad libidhoon ku waayaa?

Lullumihii biyaha galay
Abaar kuma lihiime
Aniguna liskiisii
Caashaqa ladaabtee
Waxaan labo legdoodoo
Kaligay lignaadaba
Sidaan ahay lammaan Xiid
Leyl dhexe dhawaaqee

Ma inaad labo seef ahaataa
Ma inaad kalgacalka laashaa
Ma inaad lumiso aqoontaa
Ma inaad libidhoon ku waayaa?

Erayada:
1- Laamaddood: hurdo yar ama gami'id kooban.
2- Laashaa: fogeysaa; meel fog geysaa.
3- Libdhay/Libray: qarsoomay; daahsoomay. 
4- Lallabo: loo kaco; loo jeesto. 
5- Looli: dalcad; dhul foocsan; korreeya.
6- Galduur: dhul-daaqsimeed ku yaal Soomaali Galbeed.
7- Lullume: nafley yaryar ah oo biyaha ku dhex nool.
8- Lihiin: liil; meecaad; adkaysi leh; waxtar dambe leh.
9- Lis: wax kasta oo la soo liso sida caanaha iyo dhiinka miraha. Halkaan dhiggiisii.
10- Ladaab: ku-noqnoqoshada cunnada, biyaha iwm.
11- Labo legdood: ku-galgalasho; gami'waa.
12- Lignaan: likaysan; liqdaaran; waxaan laabmeyn oo tigtigan.
13- Xiid: shinbir habeynkii mirta oo inta badan labalabo u socda. 

Waayaha Adduunka (hees)

Waayaha Adduunka

Waayaha adduunka 
Ku wax qaadan mayside
Ruux walaal ku moodaa 
Haddii uu ku wehashado
Ood wacad ka diiddaa 
Warankaad ku tuurtaa
Kugu weecan doonee 
Jacayl kuma waraystee 
Waygu waa bariistee
Halbowluhu ma wado dhiig 
Wadnahana ma siiyee
Wadkaygii ha noqonnine 
Haddaad maanta wacan tahay
Ma ku waari doontaa? 

Sidoon waalanahay baa 
Laygu wiirsadaaye
Wegar tiri lataliyahaa 
Waanadiisa diiddoo
Adigaa i wiiqee 
Haddaad adigu wacan tahay
Anay wadhi i raacdee
Gacma wada jirkooday 
Wax ku goyn karaane
Midna geed ma waabteen 
Waaxid kali ahaane
Weedhaa u fiirsoo 
Arrin aan wadaagnee 
Waa yahay aan kaa helo 

Beledweyn iyo Beerlula (hees)

Beledweyn iyo Beerlula 

Bi'i waa jacaylow
Boodhari inuu dilay
Been baan u haystee
Bi'i waa jacaylow
Boogaan la dhayinoo
Cidi baanan karinoo
Beerka iyo wadnaha iyo
Bogga kaaga taaliyo
Inuu yahay bir caashaqu
Been baan u haystee

Webigoo butaacoo
Beeraha waraabshoo
Dhulku baadku jiifoo
Dhirta ubaxu buuxoo
Badarkiyo galleyddii
Laga tuuray baalkoo
Canabkii bislaadoo
Bulladiyo ciyaaraha
Lagu waa bariistoo
Beeluhu gu' joogaan
Sow bari-samaadkii
Beledweyne maan tegin

Dhanka bari magaalada
Sow boqorod joogtoo
Biyo dahab la moodoo
Bilicdii haweenkiyo
Bilic loo dhammeeyoo.
Timo boqonta joogoo
Baal goray la moodoo
Baarkana casaankii
Bidix midig is gaadhoo
Burcad lagu xiddeeyoo
Badh ku seexanaysoo
Barkanaysa qaaroo
Huuwanaysa bar oo
Igu beertay lahashoo
U buseelay maan baran.

Sow goor barqa ahoo
Bishu ay siddeed tahay
Aniga iyo Beerlula
Isku maanan soo bixin.
Sow bariidadaydii iyo 
 Barashadeedii
Buundada ciyaartee
Beledweyn ku taallee
Biyo lulata guudkood
Badhtankeeda maahayn

Sow bixiso weeyee
Ballan maanu dhiganoo
Berri joog imay odhan
Sow bayd go'aygii
Layguma bushaarayn.
Maantaa la baxayaa
Bulshadii i may odhan.
Sow waa bestayoo
Socod beegsan maayee
Ina baaja caawoo
I baxnaansha maan odhan
Sow taliye baasoo
Ba' anoo war moogi
Taydii ma beeneyn
Sow badiba kooxdii
Goortay badheedheen
Baabuurka fuuleen
Anna baal kamaan korin

Boholyow daraaddii
Sow baraq nuglaantii
Balo lagu ducaystiyo
Baryo kuma maqnaynoo
Biri may xumaatoo
Badroolka daadshoo
Ka wadaa bukoodoo
Bogsan waayo maan odhan
Sow beriga waagiyo
Barqa kulul dhexdoodii
Geed baaxad weynoo
Dherer iyo ballaar loo
Baladweyn ku caanoo 
La yiraahdo Baaroo
Bilig dheer hirkiisii
Ma bidhaansanaynoo
Bulxankiisa yeedhiyo
Ma maqlaynin baaqii

Sow baaxad-soorihii
Iyo laba boglayntii
Ma noqon besteeyoo
Bacadkii ma dheelman.
Sow galab-boqoolkii
Annakoo barwaaqiyo
Meel baadle joognoo
Tumanaynna Beerrey
Soo maan baraarugin
Riyo beena weeyee
Sow baalla daymihii
Baabuur lalaayoo
Haad baalle mooddoo 
Bananaaya buur dheer
Is ma odhan ka boodo 
Nafta sow ma biimayn
Nin Banaadir joogoo
Baledweynna haystoo
Waxaan ahay la baabee
Sow baadi-doonkii
Wali baafis maan ihi 

Beledweyn Allahayow 
Ka dhig guri barwaaqee 
Beerlula Allahayow 
Balaayada hareer mari
Beledweyn Allahayow 
Ka dhig xero badhaadee
Beerlula Allahayow
Ka barii waxyeellada 
Beledweyn Allahayow 
Ka dhig beerta raaxada 
Beerlula Allahayow
Guryo-samo ku noolee