Basarka Geela Loo Dhaqo
(Cabdi-Galayax Maxammad Aw-Magan)
Haddaan baawar kama waayayee, bilo dhaqaaleeyo
Barrimada caleenta leh haddaan, bariba meel geeyo
Markay balaxsi doontana haddaan, dhanaha boobsiiyo
Bartuu faran ku yaallana haddaan, baalash kaga jiido
Middii aan dhukaan bido haddaan, biimo ku ogaado
Goortii ay bogsootana haddii aan, bari ka fuudsiiyo
Haddaan baanto xooluhuba way, badan xumaadaane
Baadida lumaysiyo haddaan, baylah ka ilaalsho
Bahalkiyo waraabaha haddaan, Baar ka celinaayo
Haddaan baytimaal kuma gashee, buro xannaaneeyo
Inay bulanto mooyee haddii, bixinta loo diido
Haddaan naago kuma baayacee, baali laga dhiibin
Barbaarnimiyo doobnimo haddaan, baaqi ku ahaado
Anigoo basaas qaba haddaan, bawdka hore seexdo
Boolbaraha ciiddiyo haddaan, boorashka u jiifo
Waa baxarka gelee haddaan, bire ku haaneedo
Bakhayl magac ma yeeshee haddaan, bixiyo dheefteeda
Haddaan labanka Boodey martida, ugu bashaasheeyo
Bun haddaan u dubo oo wadaad, Baro ku yaasiimo
Haddaan baraha jiilaal kobtii, baadle ku ekeeyo
Oon baagamuuddiyo u huro, inaan ka baashaalo
Bandarrada magaaliyo haddaan, balad u moogaado
Buugtiyo iskuullada haddaan, barashadood daayo
Haddaan kabo banbiira ah toshiyo, rabarka baabuurta
Haddii aanan bashlaynine xarrago, baal isaga tuuro
Baqoole iyo guuraba haddaan, baadhi la ahaado
Bilaheeda oo idil haddaan, Baayir daba joogo
Barigay dhalaysana haddaan, boqon ku seeteeyo
Barqin horada laba goor haddaan, baaciyoo celiyo
Goortay cabbaar biliqsatay, meel is babacdaaye
Bishamaha madow iyo markay, buulka hore keento
Bisinkiyo haddii aan u maro, baabaddii nabiga
Haddaan nirigta beydaanka dheer, bogga ka soo jiido
Bishaaraan iraahdaa intaan, bururo raynrayne
Basarka geela loo dhaqo haddaan, baab walba idleeyo
Intaasoon ku baaqtamay haddaaan, been ka dhigi waayo
Sow badashadiisu waa wax yare, boqol ma dhaafaayo
Erayada;
1- Baawar: awood; af-Ingiriis (power).
2-Barrimada: meelaha; goobaha.
3- Balaxsi: milix-qaadasho.
4- Faran: ka-soobax; wax oogada ka soo baxay.
5- Biimo: meel halis ah. Wuxuu u jeeda geela kale laga dhex saaray.
6- Dhukaan: cudur halis ah oo geela ku dhaca.
7- Baylah: dayac; cidlayn.
8- Baar: hal magaceed.
9- Bawd: darbiga xerada xoolaha ama ardaaga; mus; gaso.
10- Boodey: hal magaceed.
11- Bandarrada: Bandar asal ahaan waa Faarisi waana dekad; magaalooyinka xeebaha ku yaal buu ula jeedaa.
12- Baadhi: waa Af-Ingiriis (party); wuxuu ula jeedaa aan mar walba la joogo.
13- Baayir: hal magaceed.
14- Boqon: xarigga seedda xoolaha laga sameeyo.
15- Seeteeyo: xarig lugaha uga xirid; dabrid.
16- Biliqsatay: jeenjeesi; hadba dhinac aadis.
17- Beydaan: sur; luqun.
18- Basar: hab; sida; qaab.
| 
