Dhakhtar Bay Isu Keen Qoray (hees)

Hadduu dhugato geel qabo
Ma dhadhamiyo geedaa
Wuu godosho dhuubtaaye
Anna cudurkaan igu dhacay
Waa mid igu dhammaadoo
Waaba laygu dheer yoo
Ku dhadhabay aroosaan
Dhinaca isa saarree


Malaha dhaaya-haygaay
Calaf laga ma dhuuntee
Kitaab baa isu keen dhigay
Dhakhtar bay isu keen qoray
Adna wali ma dhaaddanid


May-dhanaanka geeliyo
Sida dhayda caanaha
Looma dhamo jaceylkoo
Lagu ma dhaashto caashaqa
Dhayil haw malaynine
Dhuuxiyo lafihiyo
Waa wax dhiigga kaa jaqa
Caafimaadka kaa dhima


Malaha dhaaya-haygaay
Calaf laga ma dhuuntee
Kitaab baa isu keen dhigay
Dhakhtar bay isu keen qoray
Adna wali ma dhaaddanid


Sida ruux la dhalay baan
Ku dhadhoodiyayoon
Dhibta kaa ilaashaa
Sida ruux dhallaanoo
Hurdo looga dhaartaan
Hadba dhinacyadiisiyo
Wadnaha kugu dhaweyaa


Malaha dhaaya-haygaay
Calaf laga ma dhuuntee
Kitaab baa isu keen dhigay
Dhakhtar bay isu keen qoray
Adna wali ma dhaaddanid