Kii Dhaba Jacaylkuna..(hees)

Dhirta xididka hoosaa
Dhulka loogu beeree
Waa dhici lahaayeene
Dhismahooda weeyee

Kii dhaba jacaylkuna
Halkii kama dhaqaaqoo
Dhidib baa u aasan

Waa sida dhillow-yahan
Intuu laan isaga dhagay
Dhexda loogu marayoo
Dhoqso uga baxayee

Kii dhaba jacaylkuna
Lama kala dhantaaloo
Lafuhuu dhammeeyaa

Sida dhudaha weeyaan
Isu dheellitiranoo
Mid ba dhan u baxaysoo
Dhinaca isa saaree

Kii dhaba Jacaylkuna
Waa dhaqan-wadaag iyo
Isu dhaarasho daacada

Sida dhalanka weeyaan
Dheehaa caleentee
Ubax wada dhalaaliyo
Dhinbishaa haraysee

Kol hadduu dhulman yahay
Kala dhuuman maynee
Waagaa dharaar noqon

Kii dhaba jacaylkuna
Lama kala dhantaaloo
Lafuhuu dhammeeyaa

Erayada:
1- Dhidib: Tigin; qori dhulka lagu aaso si wax loogu xiro (sida teendhada oo kale).
2- Dhillow-yahan: Qadow; waa dhir dhirta kale ka dul baxda.
3- Dhudaha: miiq; dun ama samays kale oo inta la sooho xarig iwm laga sameeyo.
4- Dhalanka: alaalo; waa caws waaweyn oo dheeraada.
5- Dhulman: bacool; waa laba qalbac oo aad u kakan (adag) oo naflayda badda qaarkeed ku dhex nooshahay. 
6- Dhinbil: abqo; dhaameel.