Leexo (hees)

Innakoo lammaane ah
Iyo labo nafqeybsi leh
Talo geed ku laashee
Adigaa is lumiyoo
Isu loogay cadawgoo
Libintaadii siiyee
Waa adigaanse liitee
Leexadu ku sidatee
Hadba laan cuskanayee

Liibaanteed adduunyada 
Ruuxna laasan maayee
Maxaa luray naftaadii?

Waa laac adduunyadu
Labadii walaalo ah
Midba maalin ladayoo
Ruuxii u liilgalay 
Lama loolo dharaggoo
Luggooyaba ma geystee
Waa adigaanse laabtiyo
Lugaha is la waayee
Meel sare lalmanayee


Liibaanteed adduunyada 
Ruuxna laasan maayee
Maxaa luray naftaadii?

Anigaba laf iyo jiir
Waa tii i laasteen
Liqi waayay oontee
Adigaa lis caanoodiyo
Laas xareediyo
Layr iyo har diidee
Waa adigaanse sidii liig
Laasimay ugaadhee
Waaqlada u leexdee


Liibaanteed adduunyada 
Ruuxna laasan maayee
Maxaa luray naftaadii?

Dhaaxaad ladnaan rays
Sidaad aar libaax tahay
Tillaabada lalaysoo
Anna lahashadaadiyo
Ladi waayay ciiloo
Liidnimo i raacdee
Lallabaha habeynkiyo
Ma libdhaan jaceyl 
Ruuxuu labo dibleeyaa


Liibaanteed adduunyada 
Ruuxna laasan maayee
Maxaa luray naftaadii?

Sirmaqabe Raxmaankow (hees)

Sirmaqabe raxmaankow
Adigaa u sahanee
Waxba maan samaynine
Gardarradu ma socotee
Sareediyo samiriyo luggooyaan 
Kala saari waayee
Siday noqonba mooyee

Hadday samadu furan tahay
Suuradaha quraankiyo
Salligaan u dirayaa 
Inay kaan sugaayay
Sidaan ahay u sheegaan

Nafta lalama socon karo
Haddii caashaq saan yaal
Seefaha la gaaree
Sahwiyoo daraaddii
Sakaliyo saaciyo abaar baan
Kala sooci waayoo
Sanqar baa igu oogane


Hadday samadu furan tahay
Suuradaha quraankiyo
Salligaan u dirayaa 
Inay kaan sugaayay
Sidaan ahay u sheegaan

Malyuun Hibo La Siistaa (Hees..Yuusuf Maraddoon Cali "AUN")

Habka luqunta heensaha
Hannaankiyo laafyaha
Tallaabada habsamidiyo
Haasaawaheedaa
Malyuun hibo la siistaa

Hilaadda iyo joogsiga
Halkay timuhu gaareen 
Anay huq igu reebtee
Soo-horjoogsigeedaa
Malyuun hibo la siistaa

Hadalkiyo sheekada 
Hubkay xiratay Maandeeq
Anaa ku hiyi qaadmee
Haybaddeeda kaliyaa
Malyuun hibo la siistaa

Nin hoodo iyo nasiib laa
Adduun hela nafteedee
Filkeed uga hanweyniye
Hagooggeeda kaliyaa
Malyuun hibo la siista

Qalbi Guran Miyaa Qosol Lagu Godlaa? (hees)

Bishu goor labo ay tahay
Seddex tirada guud
Gogoshuu fadhiyay
Ruuxii ka guday
Way soo gabtaa
Garkan iyo garkaa
Midna gaari waa
Sow inuu gadaal
Laba guri dhexdood
Gabbal ugu dam yahay
Maan gorfaynin waa
Aniguna gaddaas
Ma gufaysan kari
Galdalooladaan
Go'a saar lahaa
Gacalkiyo bulshadu 
Sow igu ma garan
Sirta gebi cidla'
Geysaye miyaan
Goor iyo ayaan
Gaar kuu sasabi?

Kaa gaabsadee
Niyad kaa go'diyo
Qalbi guran miyaa
Qosol lagu godlaa?

Goray sheedaha koray
Geedaha ku yaal
Wuxuu goosto uu
Gaan-gaanbiyaba
Sow inuu gadaal
Guulaalid iyo xuddur
 Labada garab
Gees uun u dhaco
Maan gorfaynin waa
Anna goortii aad
Giringriisayee
Dhawrkii gamuunn
Tiriyeye gab yiri 
Ha is garab socdeen
Inaad labo-gardaaq
Laabta u geddiday
Waan kugu gartee
Gar ma qaadatide
Gododlow miyaan
Goor iyo ayaan
Gaar kuu sasabi?

Garka iyo maxaad
Ii qaban gondaha
Qalbi guran miyaa
Qosol lagu godlaa?

Cabdow Barisamaadkii (hees)

Inuu beer jaceyloo
Kalgacayl ku baahiyo
Hadallada baroorta
Boogaha damqinayaan
Uu kugu baahay maqallay
Baxnaanadu siday tahay
Miyaad weli bastaa tahay
Allahayow ku sama bixi

• 
  Cabdow berisamaadkii 
  Marka sheeko baraleydii
  Kaftan la isla beegsado
  Ma baraarugtaayoo
  Boholyow ma oydaa
  Wadnahaagu u bihinbihaa
  Qof badweyn dusheediyo
  Ka tallaabay buuraha
  Maw baaqayaayoo
  Wali maw baroortaa?
  
  Bidhaan uusan gaareyn
  Biligteeda muuqa
  Ma ka daba boqoolaa
  Bacadkiyo kulaylaha 
  Dhibta maw bareeraa?
  
  Bal mid raadkii gadatayoo
  Halkii bahal ku cuni laa
  Tilmaantii ku bixitimaa
  Miyuu baafiyaayoo
  Beelaha ka goobaa?
  
  Bukaan-socodka liitaa
  Ragga waa ku badan yee
  Haw baraq nuglaan
  Hawl cirka baaxaddiisa
  Barashada is nuugtiyo
  Axdigaagan baaba'ay
  Haween baad ku barataye
  Ka adkayso baydoo
  Ha ka daba balaanbalin
  
  Baahidaada adigaa
  Dhibka baanan karayoo
  Samo waxaad bidaysana
  Kuu ma baaso geline
  Dabka kugu baxaayaa
  Boholyow i geliyoo
  Aan is iri bakhtiiye
  Adaan kuu birmanayee
  Bashbash iyo barwaaqiyo
  Baraaraan rajeeyee
  Ayaan dantaadu baabi'in
  
  

  
  

  
  

  
  

  
  

  
  

Naftu Doqonsanaa! (hees)

Naftu doqonsanaa
Waxay doonto 
Kuu diri ogaa
Dantu ka adagaa
Durba celin ogaayey
Labadoo is dardaray
Dadka dhibi ogaa
Risqi Eebbe kuu diiday
Kaa durugsanaa
Nimuu duunyo siinaayo
Deeqdi u dhawaa
Taa waxaa daliil u ah
Haadka samada duuliyo
Diinkuba u siman colaad
Ninna caysh u daayacan
Aanu daal u soo marin
Ka ma helo daleelaha

Siday diintu nagu tiri
Dayaxana ha dhaaftee
Asaaggaa darajaduu helay
Rabbi kaa ma daahine
Dadaal gaari doontide

Naftu doqonsanaa
Damac waalanaa
Dabaylaha cirkay
Hadba kugu dartaa
Durdurkaa orday
Dar u xiro kugu tiraah
Dahab aadan lahayn 
Ku tiraahdaa daldalo
Ha ka dayrin waligaa
Noloshaad la daris tahay
Ha u doodin abidkaa
Mid ka loo ku dayasha
Taa waxaa daliil u ah
Oo looga digi karaa
Xaddiis baa ku soo degay
Mar uun la is ma garab dego
Dad ma wada sinnaan karo
Dantu waa is daba mar

Siday diintu nagu tiri
Dayaxana ha dhaaftee
Asaaggaa darajaduu helay
Rabbi kaa ma daahine
Dadaal gaari doontide

Dorraato Miyaad Illawday? (hees)

Adoo darayeysan gaajo
Hadduu deeq Ilaah ku siiyo
Haddaad darajiyo xil qaaddo
Daruuraha hadduu ku geeyo
Dushuu kaa eegayaaye
Ducaa la yaboohsadaa
Kibirka waa lagu dumaa

Nimcaduu kaa daadiyaaye
Dorraato miyaad illawday?

Adoo Dabadheer ka doogtay
Markaad durdurada bilawday
Habaar lagu doori maayee
Ducaa lagu doogsadaa
Markuu doobigaagu buuxo
Daboolka haddaadan saarin
Kibirku wuu daadiyaa

Nimcaduu kaa daadiyaaye
Dorraato miyaad illawday?