Daymada Ilqabadka Le (hees)

Wiilka:
Qormo roob helayoo
Oo qanidoo
Ee xareeddu qarisaad
Qamareey quruxdeeda leedee
Qalbi-jire ilaahaay
In qanjirini le'eg tahay
Kaama uunan qadinine
Markaan Qamar ku eegaba
Qamuunyaan i lagaddee

Qortaada dheeree
Lagu qoray cabbaadhyada
Markii aad xaggayga
U soo qalloocisaaba
Ma liqdaa i qabatee

Gabadha:
Qorraxdoo aroortii
Qaar la soo baxdoo
Aan caadku qarin baad
Qummanoow,
Qaabaddeeda leedee
Nebi Yuusuf quruxdii
Qaadirkeennu siiyaad
Adna qeyb ka wadataayoo
Qeyrkaa ku dhaaftee
Haddaan qado anfaaciga
Adaan kugu qaboobaa

Marka aad qun u dhaqaaqdee
Tillaabada aad qaaddee
Deymada il-qabadka le
I qooransataa bay
Qososhaa naftayduye

Wiilka:
Labadaada qaariyo
Dhexdoo qabashadeeda
Geenyo qayrabahoo
Loo qaaday heensaha
Qotonkeeda leedee
Dayax qadimmadiisii
Aan caadku qariniyo
Cirkoo sagal ku qeydmiyo
Qureeshtii haweenkaay
Qadow geed ku yaaliyo
Qawdhihii magoolaay

Qoortaada dheeree
Lagu qoray cabbaadhyada
Markii aad xaggayga
U soo qalloocisaba
Ma liqdaa i qabatee

Gabadha:
Wax aan kugu qiyaaso
Ama kugu qaddariyo
Qabri hoosee mooyee
Qummanoow,
Qarnigaba ma noolee
Qadaf ku hadli maayee
Ammaantaan kuu qiray
Waad midaan u qalantoo
Qaayo aad ka gaadhee
Wax ilaahaay kuu qoray
Lagaa qaadi maayee

Marka aad qun u dhaqaaqdee
Tillaabada aad qaaddee
Daymada il-qabadka le
I qoraansataa bay
Qososhaa naftayduye